jan lawa en jan pi awen tomo
tenpo weka la jan lawa li lon. alasa soweli li musi mute tawa ona. tenpo la ona li tawa lon sewi soweli tawa ma pi kasi mute a li alasa e soweli. suno wan la ona li wile tawa ma kasi. soweli li lon. ilo alasa li lon. jan poka li lon. ijo ale wile li lon. tenpo kama lili la ona li open e tawa.
jan lawa li ni la jan pi awen tomo li kama wawa lon poka ona li toki e ni:
jan lawa o, o tawa ala ma kasi lon suno ni. sina ni la pakala suli li kama tawa sina. ni li sona tan lape mi pi pimeja pini.
jan lawa li kute e ni la ona li weka e wile tawa.
nasa la pakala suli li kama lon nasin pi ma kasi lon tenpo kama lili. jan lawa li kute e kama ni li sona e ni: toki pi jan awen li awen e ona tan pakala suli. ni la ona li kama e jan awen lon poka li pana e mani mute tawa ona li toki e ni kin:
mi wile ala e pali sina lon tomo mi. sina ken tawa.
jan awen li kute e toki nasa ni la ona li pilin ike li toki e tan tawa jan lawa. jan lawa li toki e ni:
pali sina li ni: sina lape ala lon tenpo pimeja li awen e tomo mi. taso pimeja pini la sina lape a. ni la sina pona ala tawa pali ni.