jan lili Silu li lon poka mi la ona li seme ?
mi wile pali e tomo sin. ma o supa pona tawa noka tomo la ilo li weka e ma mute li kulupu e ona lon poka pi ma pali. ni la nena pi ko ma li lon a. jan lili mute li tawa sewi ona li musi lon nena ni.
mama mi li wile e ko ma mute tawa ma kasi ona la mi o pana e ko tawa ona. ni li pali suli a. jan pali mute li wile. taso tenpo suno pini la mi lon tomo li pali ala la mi isipin e ni: mi ken tawa e ko mute tawa ma kasi kepeken ilo. mi ni la mama li pilin pona.
poki tawa li ilo pona tawa pali ni a. ona li poki li jo e sike wan e noka tu e luka tu. jan li jo e luka poki li sewi e poki la noka poki li lon weka tan ma. sike wan taso li lon ma la jan li ken tawa e poki.
mi pana e ko ma lon poki li tawa e ona tawa ma kasi. jan lili mi Silu li tawa lon poka mi. pana li pini la mi tawa e poki pi ijo ala li kama tawa nena. mi tawa ma kasi li kama sin tawa nena lon tenpo mute. tenpo ale la jan lili mi li lon poka mi a.
tan seme la jan lili mi li lon poka mi lon tenpo ale? o kute, jan lili li wile musi a. taso musi seme li lon tawa ona? musi pona li lon a. ona li tawa lon poki a. mi kama tan ma kasi la ijo li lon ala poki. taso jan lili li lon a. tawa poki la ona li pilin musi pi pona mute a.