o awen e tomo tan jan ike
mi sona e kama ni tan meli olin mi.
ona li toki e meli. ma linluwi la ilo Wasapu li kulupu e ona tu e meli ante mute lon tomo sama. lon tomo ni la meli ni li pana e toki. o kute e toki ni tan meli mi.
suno nanpa luka wan pi suno luka tu li sewi tawa jan pi nasin sewi Isilan. tenpo meso pi suno ni la mije ale o tawa tomo sewi ,o kute e toki sona ,o toki kulupu tawa sewi. ni la mije suli ala li lon tomo ona. ona ale li lon tomo sewi. meli en jan lili li awen lon tomo.
tomo pi meli ni la ona en meli lili en mije suli tu li lon. meli li wile lanpan e len la ona li tawa lon nasin leko tawa supa sewi. ona li open e lupa li tawa sewi tomo. sewi tomo li supa kin. tan supa ni la jan li ken lukin e tomo poka ale e kasi ale e ijo ale. tenpo la meli li weka e telo tan len anu kili lon supa ni. ona li kama jo e len li kama sin tawa supa anpa. taso ona li pini ala e lupa. taso ni li nasa ala. tenpo la pakala ni li kama tan jan ale pi tomo ni.
tenpo lili la mije tu pi tomo ni li weka tan tomo li tawa tomo sewi. meli en meli lili ante taso li lon tomo. meli suli li lon tomo supa li kepeken ilo toki. meli lili li lon tomo lape. ken mute la ona li lape.
mije ala li lon tomo la jan li kama lon poka tomo. kasi suli pi palisa wan taso li lon poka tomo. jan li tawa lon kasi tawa sewi tomo. lupa li open la jan li tawa insa tomo. ona li tawa lon insa tomo li kalama ala. meli li awen lon supa li lukin ala e ijo poka.
jan li wile tawa poka meli. ona li wile e ni kin: ona li lon poka meli la meli o ken ala tawa tomo ante. ni la jan li pini e lupa pi tomo moku. kalama ala la jan li poka tawa meli li pana e ko loje pi namako moku tawa oko meli. ni ale li pini lon tenpo lili. meli li kalama wawa. taso jan ala li kute e mu ona. meli lili li lon tomo lape. nasa la ona kin li kute ala e mu wawa pi meli suli lon tenpo ni.
jan li anpa e meli li luka wawa li noka wawa e sijelo meli li alasa lanpan e kiwen mani jelo ale tan sijelo meli. taso ona li ken ala ni tan ni: meli lili li kama tan tomo lape li kalama suli wawa a. ni la jan pi tomo poka li kama poka tawa tomo meli. jan lanpan li sona e ni la ona li weka wawa lon tenpo lili.
ike la jan ala li ken alasa e ona. ken mute la jan ni li tan tomo poka. mi wile e ni: jan lawa o lanpan e ona lon tenpo poka.